Cat's World

香港回歸1o週年紀念老公帶我上深圳玩，7月1日6點幾老公同隊友食完飯返黎
問我有冇回鄉証，我答佢冇回鄉証但係有回鄉卡  哈哈！
之後老公就叫我換衫佢同我上深圳玩，之後我地同阿克就搭7：15pm車出去
上到車仲有waity、新仔、長人、大怪同 yoyo 媽，今次係老公第一次帶我同埋佢d fd上去深圳玩
出到去青衣再轉的士上皇岡，過到去深圳都係10點幾，咁我地就話去菠蘿基屋企放低 d 野先

上到去新仔同長人佢地就搞事喇  佢地見到有乜就猜乜，勁搞笑囉佢地
佢地竟然連罐頭五香肉丁都唔放過，點知輸左囉，我老公同阿克一人食一罐  
但係都唔夠阿本慘，要食成罐豆豉鯪魚，之後再食多 5 塊提子方包  
後尾新仔同菠蘿基連淡而冇味既白方包都猜埋，點知每人輸一次，每人食 3 塊白方包
最絕既係食完唔准飲水喎，超低能... 勁搞笑，真係比佢地搞死，而我就真係笑到肚都痛埋  
玩完一餐之後就等埋阿青、阿權上黎我地就出發嚕，我地落左去 Baby k 唱 k

上到去間房勁 q 多人囉，我諗都有廿幾人，我好耐冇去唱 k 啦，仲要係咁大班人一齊玩
果晚都唔知開左同飲左幾多支黑牌（Black Lable），我都飲左唔知幾多杯咯  
不過黑牌溝石榴汁又好易入口幾好飲喎，最正就係個個都玩得好鬼死 high 呀
不過... 對我黎講只要有老公陪住我就咩都好玩架啦，呵呵！

下面就係向西村啦，即係我地 hea 既地方囉。


我地玩到3點就走喇，落到去樓下見到對面打交，嘩！d 人四方八面咁走出黎
我地緊係企到睇下野先啦，我發覺老公當時好緊張我  因為佢一直拖住我唔比我行咁前睇人打交
我地睇左一陣就走喇，上返去菠蘿基屋企到 hea，waity 同長人佢地4點幾落左去食野
我同老公就5點幾落街搵地方揼骨，第 1 間搵左菠蘿基屋企對面果間但係就冇房囉  
我地就話搵多幾間睇下點先算，點知行行下老公就見到長人既背影，真係岩喇
最後我、老公、waity、長人、新仔、阿本、阿青就去左間唔記得叫咩名既休閒中心揼骨
而我就緊係跟住老公一齊揼架啦，嘿嘿！揼揼下我已經訓鬼左
因為之前既酒氣散左好眼訓，揼完我都唔知幾點，之後就同老公一齊訓覺覺豬嚕。

向西村附近既地方，而路牌果張相係坐緊的士去碌齡果時影既。


第2日點幾鐘阿青走黎我地間房叫我地起身，之後等黎等去都唔見 waity、新仔同阿本出黎
最後我地4個人走先唔鬼等佢地啦，之後我地就去左搵阿克食野
我地去左向西路既東寶茶餐廳飲茶，食完野上黎去菠蘿基屋企到 hea
到左 4 點幾 waity 終於見人囉，真係勁喎！我地 hea 到5點幾6點就話去打保齡球
我地就去左黃貝嶺既華麗灣保齡球館打
原來我同老公都唔係打保齡球既人才黎，打黎真係得啖笑  笑死左！

老公打保齡球的背影 + 我穿了打保齡球時所穿的鞋。


我地每人打左4局，打完果時都係7點左右，菠蘿基話要返屋企，阿克同長人就提議去篤波
最後我地 5 個人就落左去 2 樓篤波，我覺得係搵我笨既，我都唔識篤波咪得我睇佢地 4 個篤
睇到我釣晒魚  篤完已經 9 點喇，我地就提議去野食先
食飽飽之後就搭的士去羅湖過關返香港嚕，嘩！嘩！嘩！過關果到勁多人囉，迫到阿媽都唔認得
d人又推黎推去真係想#%&^$!#  好彩有老公係我後面到攬住我黎行
等我唔駛比人推黎推去，老公對我真係好囉，啜啜！

老公打桌球的背影，很帥啊！


我地返到屋企都已經凌晨點幾鐘，我實在太累了所以冇打到日記
仲要一覺訓到今日晏晝先起身，老虎12點幾打電話黎叫我落去食野
我都話仲係好眼訓  我覺得我好勁囉咁好訓，不過就周身骨痛囉  
可能揼完骨個人散晒呱，頭先老公打比我佢話聽日唔駛開夜
同我去太子鋸扒，好野！有牛扒食嚕  呵呵！